Kunstmin Gorssel

Een foto uut een olde deuze. Veur mi'j is 't mooi um zo terugge te gaone in de tied, met 't weeerzene van olde bekenden. Ik gao d'r een hele boel opneumen, misschien dat d'r veur oe ook nog wel bekenden tussen zit?
Een foto van een jubileumreceptie van muziekvereniging "Kunstmin" uut Gorssel. Wi'j bunt hier in zale "Concordia", toen de thuusbasis van "Kunstmin". 't Was een onderdeel van hotel "De Roskam" van Harry van der Meij. Disse foto is uut de jaoren zeuventig. De muzikanten van "Kunstmin" draagt nog 't olde blauwe uniform.
An de taofel met 't Perzische kleedjen ku'j mi'j zeen zitten, met de lange heure en de brille. Ik kiek naor mien deerne, Yvonne, die'j half op de rugge zeet. Neust mi'j zit mien breur Geert, ok al met zo'n smal köpken. En daorneust zit meester van Wijk uut Epse.
An de andere kante van Yvonne zit Anneke ten Have, toen vriendinne van Yvonne. Anneke woont in Harfsen. En dan zit der nog een blonde keal an taofel, dat is Henny Prinsen slagwerker bi'j de drumband van "Kunstmin". 
An de ronde taofel op de veurgrond zit wat bestuursleden van "Juliana" Almen, zustervereniging van "Kunstmin". duudelijk in beeld is ome Jo Pardies, brille op, hand op taofel. Ome Jo was veurzitter en muzikant op de grote bas. Ik zag um wel is als een soort "vader" van de vereniging.
Ik wazze van huus uut lid van "Kunstmin", net als zovölle Muilemans uut Epse of Gorssel. Dat ging van vader op zönne.
Toen ik in 1977 schoolmeister werd in Almen werd ik al gauw deur ome Jo 'evraogd um bi'j "Juliana" te kommen. Dat heb ik ok édaone, maor ik bleef ok lid van "Kunstmin". Een jaor later werd ik 'ekaozen as veurzitter van "Juliana", en toen heb ik bedankt veur "Kunstmin". Hoewel ik nog verscheidene maol bi'j "Kunstmin" met heb 'eblaozen als invaller of verstarking.
Teagenaover ome Jo zit ome Hendrik Wentink, brille op en de ellebaoge op taofel. Ome Hendrik blies trompet, net as ik, en ik zatte ok neust hem in 't orkest. An de andere kante zat altied ome Gerard Tragter.
De man die naor ome Hendrik toe 'ekeerd zit, veur mi'j herkenbaor an zien flapeurken, is Scheuter. Bestuurslid en klarinettist. Tegenwoordig zol'n wi'j zeggen: "Een markante persoonlijkheid met een duidelijk eigen zienswijze." Maor toen zeiden wi'j gewoon: "Olderbarstend eigenwies."
Rechtsvoor, naast Scheuter,, zit "Kunstmin" muzikant Berend van der Vlekkert. Berend sloeg de grote trom!
An de bestuurstaofel van "Kunstmin" zeet wi'j allereeerst Elly Meiulenbrugge-Koers. Elly is fluitiste, nog steeds, en tegenwoordig dacht ik lid van "Stedelijk Orkest Lebuïnus" uut Daeventer.
Neust eur zit Rinus Paolman, lid van de drumband. Dan, met de donkere heure, Gerard Hafkamp. Gerard was de secretaris, en blies toen de trombone, latere is 'e verder 'egaone op de bas.
En dan kump Harm van Lente, de veurzitter en hé blees op de tuba. Aover een markante persoonlijkheid 'espraoken..... Wijlen mien schoonvader, Gerrit Onnink, hef vrogger een paar jaor veur van Lente 'ewarkt. Later zeit 'e wel eens: "Harm van Lente, daor kan 'k wel een book aover schrieven!" Maor Harm had meer een krachtige persoonlijkheid, en een goed hart. Hé hef heel völle veur de muziek 'edaone.
Dan zee ik de penningmeester zitten, Dijkerman, basblaozer. daorneust zit mien naamgenoot Henk Muileman, trombonist. Henk was een naeve van mien va Gerrit Muileman. 
en vervolgens Jo van Elburg, hoornist, in gesprek met meneer Fransen, de dirigent van "Kunstmin". An 't ende van de taofel zit nog Henk van der Meij, tuba blaozer.

Kan een afbeelding zijn van 3 mensen en binnen

Contact

Henk Muileman
De Hof 16
7218LB Almen

+31.638221197

© 2020 Alle rechten voorbehouden.

Mogelijk gemaakt door Webnode